Дэлхийд анх удаа чихрийн шижинг эмчилжээ

Дэлхийд анх удаа чихрийн шижин өвчнийг эсийн эмчилгээ ашиглан эдгээсэн тохиолдол БНХАУ-д бүртгэгдээд байна.

Өвчтөн 25 жилийн турш II хэлбэрийн чихрийн шижин өвчтэй байсан 59 настай эрэгтэй бөгөөд  2017 онд бөөр шилжүүлэн суулгах мэс засал хийлгэсэн боловч цусан дахь сахарын хэмжээг хянадаг нойр булчирхайн үйл ажиллагаа алдагдаж, өдөр бүр олон удаа инсулин тарилга хийлгэдэг болсон байна.

Шанхай хотын Чанжен эмнэлгийн тэргүүлэх судлаач Инь Хао энэ сарын эхээр "Тэр чихрийн шижингийн ноцтой хүндрэл үүсэх эрсдэлтэй байсан" гэж “The Paper” сонинд ярьжээ. Өвчтөн 2021 оны долдугаар сард шинэлэг эс шилжүүлэн суулгах мэс засал хийлгэсэн байна. Эс шилжүүлэн суулгаснаас хойш 11 долоо хоногийн дараа өвчтөн инсулин хийлгэх шаардлагагүй болж, цусан дахь сахарын хэмжээг хянах амны хөндийн эмийн тунг нь аажмаар бууруулж, нэг жилийн дараа бүрэн зогсоосон байна. Хяналтын шинжилгээгээр өвчтөний нойр булчирхайн үйл ажиллагаа сэргэсэн нь батлагджээ.

Канадын Бритиш Колумбийн их сургуулийн эсийн болон физиологийн шинжлэх ухааны тэнхимийн профессор Тимоти Киффер "Энэ судалгаа нь чихрийн шижин өвчний эсрэг эсийн эмчилгээний салбарт чухал ахиц дэвшил болсон гэж бодож байна" хэмээжээ.

Нойр булчирхайнаас үүсдэг инсулин нь цусан дахь сахарын хэмжээг зохицуулахад зайлшгүй шаардлагатай. Чихрийн шижин өвчний үед энэ систем алдагддаг. Бие нь хангалттай инсулин үүсгэдэггүй, эсвэл үйлдвэрлэсэн инсулиныг үр дүнтэй ашиглаж чаддаггүй. Чихрийн шижингийн хэд хэдэн төрөл байдаг бөгөөд эдгээрээс II хэлбэр нь хамгийн түгээмэл бөгөөд өвчлөгсдийн бараг 90 хувь нь өвчилдөг.

Чихрийн шижингийн төрлөөс үл хамааран цусан дахь глюкозын түвшинг хэвийн хэмжээнд байлгахгүй байх нь зүрхний өвчин, хараа муудах, бөөрний өвчин зэрэг ноцтой сөрөг үр дагаварт хүргэдэг. АНУ-ын Өвчний хяналт, урьдчилан сэргийлэх төвийн мэдээлснээр чихрийн шижин өвчнийг эмчлэх эм хараахан гараагүй байна. Жингээ хасах, зөв ​​хооллох, эм уухын зэрэгцээ инсулин эмчилгээг зөвлөдөг.

Дэлхийд БНХАУ чихрийн шижин өвчтэй хүмүүсийн тоогоор тэргүүлдэг. Олон улсын чихрийн шижингийн холбооны мэдээгээр тус улсад чихрийн шижин өвчтэй 140 сая хүн байгаа аж. Үүнээс 40 сая орчим нь насан туршдаа инсулин тарилгад хамрагддаг байна.

Гадаад харилцааны зөвлөлийн дэлхийн эрүүл мэндийн асуудал эрхэлсэн ахлах ажилтан Хуан Янжун хэлэхдээ, Хятадын чихрийн шижинтэй хүн амын тоо харьцангуй өндөр байна гэжээ.

Өнгөрсөн жилийн нийтлэлдээ тэрбээр Хятад улс дэлхийн хүн амын 17.7 хувийг эзэлж байхад тус улсын чихрийн шижин өвчтэй хүн ам дэлхийн нийт хүн амын дөрөвний нэгийг эзэлж байгаа нь эрүүл мэндийн асар их дарамт учруулж байна хэмээж байсан. Хэрэв эсийн эмчилгээний энэ арга нь үр дүнтэй бол өвчтөнийг архаг эмийн дарамтаас чөлөөлж, эрүүл мэнд, амьдралын чанарыг сайжруулж, эрүүл мэндийн зардлыг бууруулж чадна гэж судлаачид үзэж байна.

Эх сурвалж: South China Morning Post

Сэтгэгдэл:
Таны IP: (127.0.0.1)