Хятадын өмнөд хэсгийн 19 сая хүн амтай Гуанжоу хотыг хар салхи дайрчээ
Хятадын өмнөд хэсгийн 19 сая хүн амтай Гуанжоу хотыг өнгөрсөн бямба гарагт дайрсан хар салхины улмаас таван хүн амиа алдаж, 33 хүн шархадсан талаар Хятадын төрийн хэвлэл мэдээлжээ.
Синьхуа агентлагийн мэдээлснээр, 141 үйлдвэрийн барилга эвдэрсэн бол орон сууцны байшин эвдэрсэн эсвэл нурсан тохиолдол бүртгэгдээгүй байна. Хонгконгоос 80 миль (130 км) зайд орших Гуанжоу нь Гуандун мужийн нийслэл хот юм. Синьхуа агентлагийн мэдээлснээр хар салхи болсон газраас 1.7 милийн зайд орших Байюн дүүргийн Лянтиан тосгоны цаг уурын станцад бүртгэгдсэнээр салхины хурд секундэд 20.6 метр хүрч байжээ.
Хятадын өмнөд хэсгээр олон хоног үргэлжилсэн аадар борооны дараа хар салхи болж, үерийн гамшиг нүүрлэж, олон арван сая хүний амь насанд аюул заналхийлж байгаа тул аврагчид оршин суугчдыг яаралтай нүүлгэн шилжүүлэхээр ажиллаж байна. 127 сая хүн амтай эдийн засгийн хүчирхэг бүс болох Гуандун мужид үерийн гамшиг тохиолдож, 110 мянга гаруй хүнийг нүүлгэн шилжүүлэхээс өөр аргагүйд хүрсэн билээ.
Дөрөвдүгээр сарын 16-наас хойш тасралтгүй аадар бороо орсны улмаас Хятадын үйлдвэрлэлийн төв, хамгийн олон хүн амтай бүс нутгийн нэг болох Гуандунд үер болоод байгаа билээ. Тус бүс нутаг жил бүр дөрөвдүгээр сараас есдүгээр сар хүртэл үерт автдаг ч сүүлийн жилүүдэд тус бүс нутагт илүү хүчтэй аадар бороо орж, үер усны гамшиг ихсэж байгааг эрдэмтэд анхааруулж байна.
Хятадад хар салхи АНУ-д тохиолддог шиг тийм олон удаа тохиолддоггүй. 2015 онд хийсэн эрдэм шинжилгээний өгүүлэлд Хятадад жилд дунджаар 100-аас бага хар салхи болж, 1961 оноос хойших 50 жилийн хугацаанд дор хаяж 1772 хүн хар салхины улмаас нас барсан болохыг тогтоожээ. БНХАУ-ын Цаг уурын газраас аадар бороо орж, хүчтэй шуурга энэ сарын сүүл хүртэл үргэлжлэх төлөвтэй байгааг анхааруулж байна.