Хүнс болон эрүүл мэндийн салбарын стандартыг шинэчлэхийг үүрэг болгов

Монгол Улсад мөрдөгдөж байгаа хүнс болон эрүүл мэндийн салбарын стандартуудыг энэ оны зургаадугаар сарын 1 гэхэд шинэчилэхийг Шадар сайд С.Амарсайхан стандарт, хэмжил зүйн байгууллагад өнөөдөр үүрэг болголоо.

Монгол Улсад өнөөдрийн байдлаар нийт 6819 стандарт хүчин төгөлдөр мөрдөгдөж буйгаас хамгийн олон буюу 802 нь эрүүл мэнд, 663 нь хүнс, хөдөө аж ахуйн салбарын стандарт эзэлж байна. Эрүүл мэнд болон хүнс, хөдөө аж ахуйн салбар нь хүн амын эрүүл мэнд, амь нас, цаашлаад үндэсний аюулгүй байдалтай шууд хамааралтай тул цаг үе, нөхцөл байдалтай уялдуулан зарим стандартыг нэн даруй өөрчилж,  шинэчлэх, шаардлагагүй хэсгийг нь хүчингүй болгох зэргээр эрс шинэчлэл хийх хэрэгтэй байгааг Монгол Улсын Шадар сайд С.Амарсайхан өнөөдөр болсон Стандарт, хэмжил зүйн салбарын удирдах ажилтны зөвлөгөөнд оролцохдоо онцлов.

Үндэсний стандартын шинжлэх ухаан, техникийн түвшингийн 2018 оны улсын үзлэгээр эрүүл мэндийн салбарын 407 стандартыг дахин хянаж, шинэчлэх дүгнэлт гаргаснаас одоогоор 31 буюу 7.6 хувийг нь шинэчилжээ. Мөн хүнс, хөдөө аж ахуйн салбарт нийт 570 стандартыг дахин хянаж шинэчлэх шаардлагатай гэж дүгнэлт гарсан ч 64 стандартыг л хянаж шинэчилсэн нь туйлын хангалтгүй үзүүлэлт гэдгийг Шадар сайд анхааруулсан юм. 

Хөгжингүй орнуудад хүнсний бүтээгдэхүүний шошгоны ар дээрх мэдээллийг боловсруулалт хийж, сав баглаа боодлын нүүрэн хэсэгт тухайн бүтээгдэхүүний чанар, стандартыг A B C D E гэсэн 5 ангиллаар, 3 өнгөөр ялгаж байршуулдаг аргачлалыг сүүлийн жилүүдэд нэвтрүүлж эхэлсэн. Жишээ нь, ногоон өнгөөр ялгасан А ангиллын хүнс илүү шим тэжээллэг, органик ангилалд багтдаг бол улаан өнгөөр ялгасан Е ангиллын хүнс шим тэжээл хомс, эрүүл мэндэд эрсдэлтэй хүнс гэдгийг шууд илтгэдэг байна. Энэ мэтчилэн хэрэглэгчидтэйгээ илүү ойртож ажиллах цаг үеийн шаардлага тулгараад буйг зөвлөгөөний үеэр онцолж байлаа.  

Хүнсний хангамжийн гол нэрийн 16 бүтээгдэхүүнээр тооцоход манай улсын хүн амын хүнсний хангамж малын мах, сүү, сахар, ургамлын тос, гурил, төмс зэрэг 6 нэр төрлийн бүтээгдэхүүн зонхилж буй нь амин дэм, эрдэс бодисын дутагдалд өртөхөд нөлөөлж байгаад анхаарах шаардлагатайг мэргэжилтнүүд мөн хэлж байв. Иймд нэн түрүүнд хүнс болон эрүүл мэндийн салбарт мөрдөгдөж буй стандартуудыг дахин хянаж нягтлаад шинэчлэх, өөрчлөх, хүчингүй болгох шаардлагатай стандартуудыг зургадугаар сарын 1 гэхэд цэгцлэх  хугацаатай үүрэг өглөө.

Сэтгэгдэл:
Таны IP: (3.236.52.68)