Газар өмчлүүлэх асуудал, гадаадаас ажиллах хүч авах тухай хэлэлцэв
Засгийн газрын хуралдаан өнөөдөр 08.00 цагт эхэлж, 24 асуудал хэлэлцэж байна. Хуралдаанаар Монгол, Хятадын Замын-Үүд, Эрээний эдийн засгийн хамтын ажиллагааны бүс байгуулах тухай Монгол Улсын Засгийн газар, БНХАУ-ын хэлэлцээрийг соёрхон батлах тухай, Чөлөөт бүсийн тухай хуульд өөрчлөлт оруулах тухай хуулийн төслийн тухай, Концессын гэрээ байгуулах, зөвшөөрөл олгох тухай, Үй олноор хөнөөх зэвсэг дэлгэрүүлэх болон терроризмтой тэмцэх тухай хуулийн төслийн тухай хэлэлцэж байна.
Мөн хэлэлцэх асуудлын жагсаалтад Ерөнхий консулыг эгүүлэн татах тухай, Төсвийн ерөнхийлөн захирагчдын төсвийн хязгаар батлах тухай, Төрийн банкны талаар авах зарим арга хэмжээний тухай, УИХ-ын гишүүн Д.Оюунхоролын боловсруулсан Итгэлийн зээл олгох тухай хуулийн төсөлд өгөх Засгийн газрын санал дүгнэлтийн тухай, Гадаадаас ажиллах хүч, мэргэжилтэн авах тухай асуудал багтжээ.
Түүнчлэн Нийслэлд 2019 онд иргэнд газар өмчлүүлэх газрын нийт хэмжээ, байршил, зориулалтыг тогтоох тухай, Монгол Улсын Шадар сайд олон улсын чуулга уулзалтад оролцсон дүнгийн талаар, Хөөт аж үйлдвэрийн парк төслийн хүрээнд Үндэсний хөгжлийн газраас гаргасан санал дүгнэлтийн талаар, Хөдөлмөр эрхлэлтийн дэмжих сангийн хүрээнд хэрэгжүүлэх орон нутгийн онцлог, хэрэгцээнд нийцүүлсэн зорилтот төслийн талаар, 2019 оны хаврын тариалалтын урьдчилсан дүнгийн талаар, Цахилгааны тарифын хөнгөлөлтөөс үүссэн өр төлбөрийн талаар хэлэлцэнэ.
