Дэлхийн дулаарлаас үүдэлтэйгээр дундаж орлого буурахаар байна
ХБНГУ-ын Потсдам дахь уур амьсгалын нөлөөллийн судалгааны хүрээлэнгийн судлаачдын "Nature" сэтгүүлд нийтэлсэн судалгаагаар цаг уурын өөрчлөлтөөс үүдэн дэлхий дахины орлого 2049 он гэхэд жилд 19 хувиар буюу 38 их наяд ам.доллароор буурахаар байгаа аж.
Уур амьсгалын өөрчлөлт нь ойрын 25 жилийн дотор дэлхийн бараг бүх улс, тэр дундаа Герман, АНУ зэрэг өндөр хөгжилтэй орнуудад эдийн засагт асар их хохирол учруулж, дундаж орлого тус бүр 11 хувиар буурахаар байна гэж судалгааны хамтран зохиогч, цаг уурын судлаач, эдийн засагч Леони Венз онцолжээ.
Сүүлийн хэдэн арван жилийн турш эрдэмтэд болон бусад хүмүүс цаг уурын хамгийн том нөлөөлөл болох дулааны давалгаа, үер, ган, шуурга зэрэг цаг агаарын эрс тэс уур амьсгалд анхаарлаа хандуулсаар ирсэн. АНУ-ын Үндэсний Далай, Агаар мандлын Удирдлагын газрын мэдээлснээр, өнгөрсөн онд дэлхийн дундаж температур нь үйлдвэржилтийн өмнөх үеийнхээс Цельсийн 1.35 хэмээр (Фаренгейтийн 2.43 хэм) илүү дулаан байжээ.
Дэлхийн хамгийн ядуу орнууд хамгийн баян орнуудаас 61 хувиар илүү орлогын алдагдал хүлээх болно гэж судалгаа тооцоолжээ. Энэхүү шинэ судалгаа нь дэлхийн 1600 бүс нутгийг судалж, уур амьсгалын хэд хэдэн хүчин зүйлийг харгалзан үзэж, уур амьсгалын эдийн засгийн цочрол хэр удаан үргэлжлэхийг судалсан гэжээ.
Эх сурвалж: AP NEWS
