Хятад нүүрсээр ажилладаг цахилгаан станцынхаа тоог нэмэгдүүлнэ
Хятад улс өнгөрсөн жил нүүрсээр ажилладаг цахилгаан станцуудын тоогоо нэмэгдүүлсэн нь анхаарал татаад байна. Учир нь тус улс хамгийн их хор хөнөөлтэй чулуужсан түлшний хэрэглээндээ хатуу хяналт тавина гэж амласан ч хүчин чадлыг нь сүүлийн есөн жилд байгаагүйгээр хурдацтайгаар нэмэгдүүлсэн талаар Сан Францискод төвтэй “Global Energy Monitor”-аас гаргасан судалгаандаа онцолжээ.
Тайланг хамтран нийтэлсэн Эрчим хүч, цэвэр агаарын судалгааны төвийн Хятадын шинжээч Цинь Ци "Хятадад сүүлийн үед нүүрсний эрчим хүчний бүтээн байгуулалт эрчимжиж байгаа нь дэлхийн чиг хандлагатай эрс зөрчилдөж, Хятадын уур амьсгалын өөрчлөлтийн зорилтыг эрсдэлд оруулж байна" гэжээ.
Хятад улс 2023 онд нэмж 70.2 ГВт-ын нүүрсний цахилгаан станцын барилгын ажлыг эхлүүлсэн бөгөөд энэ нь дэлхийн хэмжээнд эхлүүлсэн нүүрсний цахилгаан станцын барилгын ажлын 95 хувийг эзэлж байна. Олон улсын эрчим хүчний агентлагийн мэдээлснээр дэлхийн хамгийн том нүүрсний хэрэглэгч, үйлдвэрлэгч Хятад улс 2011 оноос хойш дэлхийн нүүрсний хэрэглээний талаас илүү хувийг дангаараа бүрдүүлж байна. Нүүрсний хэрэглээ болон нүүрсний эрчим хүчний салбарт хөрөнгө оруулалт нэмэгдэж байгаатай холбогдуулан тус улс нүүрсний эрчим хүчний өргөтгөлийг таслан зогсоох, хуучирсан сүлжээний менежментийг шинэчлэх талаар шийдвэртэй арга хэмжээ авахгүй бол зорилтоо биелүүлж чадахгүй, эдийн засгийн томоохон хохирол амсах эрсдэл өндөр байна байгааг мэргэжилтнүүд онцолж байна.
“Хятад улс уур амьсгалын өөрчлөлтийн эсрэг зорилтоо биелүүлэх боломжтой хэвээр байгаа ч нэн даруй, шийдэмгий арга хэмжээ авах шаардлагатай" гэж GEM-ийн нүүрсний хөтөлбөрийн захирал Флора Шампенойс ярьжээ. 2040 он гэхэд одоогийн нүүрсний хүчин чадлаа зогсоох зорилтыг биелүүлэхийн тулд дэлхийн улс орнууд ирэх 17 жилийн хугацаанд жил бүр дунджаар 126 ГВт-ын хүчин чадалтай буюу долоо хоногт хоёр нүүрсний станцтай тэнцэхүйц эрчим хүчийг сэргээгдэх эрчим хүч болон бусад эх үүсвэрээс ашиглах ёстой байна.
Эх сурвалж. Scmp.com
