"Богдхан төмөр зам" төслийн нарийвчилсан зураг боловсруулна

Ерөнхий сайд Л.Оюун-Эрдэнэ "Богдхан төмөр зам"-ын нарийвчилсан зураг төсөл боловсруулахад шаардах судалгааны ажлын санхүүжилтийг богино хугацаанд шийдвэрлэж Засгийн газрын хуралдаанд танилцуулахыг төслийн ажлын багийн гишүүд болох Сангийн сайд, ЗТХ-ийн сайдад даалгалаа. 

Төслийн ажлын багийн гишүүд өнөөдөр "Богдхан төмөр зам" төслийг хэрэгжүүлэх ажлын явцын талаар ажлын Ерөнхий сайдад танилцуулсан юм. Уг төсөл нь Монгол-Оросын хувь нийлүүлсэн “Улаанбаатар төмөр зам” нийгэмлэг /”УБТЗ” ХНН/-ийн гол замаас Мандал өртөөнөөс салаалан Богдхан уулын урдуур тойрч Мааньт өртөөнд холбогдох чиглэлтэй төмөр замын төсөл юм.

Төсөл хэрэгжснээр, төмөр замын дамжин өнгөрөх болон бусад экспорт, импортын ачаа тээврийг Богд уулын урдуур тойруулж, Нийслэл дундуур өнгөрүүлэлгүй аялуулна. Төмөр замын одоогийн шугамыг зорчигчийн галт тэрэг аялуулах, хот дүүргийн нийтийн зорчигч тээвэрт ашиглах боломж бүрдэх юм.

Мөн төсөл нь “УБТЗ” ХНН-ийн гол замын хамгийн өндөр хэвгийтэй, галт тэрэгний жин 4.2 мянган тонн хүртэл буурч жингийн хугарал үүсгэдэг өгсүүр хэсэг болох Эмээлт, Хоолтын давааг тойруулж тавьснаар галт тэрэгний хэсгийн хурд нэмэгдэнэ. Үүний зэрэгцээ бүх хэсгүүдэд ижил буюу 5800-6000 тонн жинтэйгээр аялж ачаа тээвэрийг жилд 5-6 сая тонноор нэмэгдүүлэх аж. Түүнчлэн Эмээлт зөрлөгөөс Хангай зөрлөг хоорондын замд байрлах хамгийн бага радиустай тахирууд дээр үүсдэг хүндрэлийг шийдвэрлэж, зам ашиглах зардлыг багасгах эдийн засгийн үр ашигтай юм. Улаанбаатар хотын автозам болон төмөр замын ачаа тээврийн ачааллыг бууруулах, эргэлтийг нэмэгдүүлэхэд үр өгөөжөө өгнө хэмээн тооцож байгааг танилцууллаа. 

Богдхан төмөр замыг барьж байгуулах талаар УИХ-аас 2016 онд баталсан “Монгол Улсын Засгийн газрын 2016-2020 оны үйл ажиллагааны хөтөлбөр” болон “Монгол Улсын эдийн засгийг сэргээх хөтөлбөр”-т тус тус тусгасан байдаг.

Иймд ажлын багийн ерөнхий төлөвлөгөө, зураг төслийн ажлын урьдчилсан төсөв, төлөвлөгөөний шинэчилсэн ерөнхий мэдээллийг танилцууллаа. Нэн тэргүүнд нарийвчилсан зураг төсөл боловсруулахад шаардах судалгааны ажлыг эхлүүлэх нь зүйтэй гэдгийг  Ерөнхий сайд тэмдэглэсэн юм.  Сангийн сайд, ЗТХ-ийн сайд нар судалгааны ажлын санхүүжилтийг богино хугацаанд шийдвэрлэх гарцыг судалж, Засгийн газрын хуралдаанд танилцуулахаар болов.

Сэтгэгдэл:
Таны IP: (3.238.96.184)